الاثنين، 18 يوليو 2011

البكاء ~ الجزء الاول

يعني العياط بالعامية...

العياط يختلف من شخص لشخص و حسب البيئة و الفئة العمرية و أيضا حسبب المسبب للبكاء...فبكاء الطفل الرضيع يختلف في الشكل و التطبيق و المسبب عن بكاء الطفل ذات الخمس سنوات الذي يختلف بدوره عن بكاء الطفل ذي ال7 سنوات، من أخذ عينات عشوائية و مزاجية و غير مرتبطة بأي شكل رسمي أو أي هيئة عليا (أو حتى سفلى) قدرت اني أصنف البكاء و مسبباته حسب الفئة العمرية

أولا: البكاء الطفولي
التعريف: و هو بكاء الطفل و يعود لعدة أسباب ممكن الجوع، الملل، الرغبة في الخروج و النوم في السيارة، رغبته بالحصول على الذي بيدك مهما كان، الخوف، صوت عالي سمعه..... و ممكن أن يكون بكاء من دون و لا سبب هيك مزاجه و ما بدو اشي و غصبن عن راس الي خلفوك بدك تتحمل الولد!

العمر: من يوم و حتى سنتين أو 3 سنوات تقريبا

طرق وقفه: للأسف هذا النوع لا يمكن معرفة سببه و بالتالي بدك تضل تجرب لحد ما يسكت الولد مع ملاحظة انو الولد ممكن يكون بعيط من دون سبب!


ثانيا: بكاء المدارس و ما يرتبط فيها


التعريف: هو بكاء الطفل نتيجة لذهابه للمدرسة أو الحضانة


العمر: من أول ما يدخل الروضة لحد الصف الرابع


طرق وقفه:غير متوفرة لحد الأن، بس في حل بديل انك تقعد معه و تصير تحمله جميلة انك بتصرف عليه و انو دنبك انهرى من قد ما هزيتو للمدرا و انك حتى بطلت تقدر تلعب بدنبك من ورا مرتك لأنو دنبك مشغول...
و برضه بتصير تحملو جميلة بالتوصيل للمدرسة و تصير تحكيلو انك كنت تروح من القرية للمدسة الي بتبعد 3 كيلو مشي عرجليك و انو كانت الكتب أخمل من كتب الجامعات وقتها و وزنها تقيل و انك كنت تدرس على ضو الشمعة....الخ
ملاحظة:هاي الأمور راح تخفف حدة البكاء و لكن ليس بالضرورة أن توقف البكاء كليا!





ثالثا: بكاء المراهقة
التعريف: و هو البكاء الذي يحدث خلال فترة المراهقة و هنا يجب التفريق بين جنس المراهق، اذا كان بنت تكون أسباب تافهة مثل (علامة منخفضة في المدرسة، في واحد بتحبه مو معبرها، أبوها زعلها، بتمر بمرحلة عشق تامر حسني ...الخ) أما بالنسب للشب فبتكون أسباب البكاء اما انو ماكل قتلة من شباب تانيين أو صاحبتو حلقتلو عل ناعم!

العمر:بين  12-18

طرق وقفه: لا يوجد طرق فعالة و لكن يظهر الدور الفعال للسجاير و الدخان في تخفيف حدة البكاء فبصير الشب يدخن و يشرب بيبسي بالحارة ورا البيت عشان ما حدا يشوفو و بتعرف على شلة من الشباب الطيبة الي بتصير تعلمو كيف يسحب الدخان لجوه...
أما البنت فحالتها أحسن بقليل، يعني ممكن تقضيها عل تليفون مع صاحباتها الي بهونو عليها الموضوع و في الحالات الغرامية بتصير تستعمل صاحباتها كمراسيل للحب و عشان يصالحوها مع حبيبها بس بطريقة غير مباشرة عشان تحفظلها كرامتها...


ثالثا: بكاء الجامعة



التعريف: هو بكاء البنت نتيجة لتحصيلها علامة منخفضة، أو بكائها عشان حبيبها (قحطلها) و راح مع حدة تانية....الشباب نادرا ما يعيطو بهاي الفترة

العمر: 19-25

طرق وقفه: مافي طرق ناجحة 100% و لكن البنات و المعارف بحاولو قد ما يقدرو يهدوها و يجيبولها ساندويشة لينة أو سلطة صغيرة عل غذا أو علبة عصير 


و للبقية تكملة مع الجزء الثاني قريبا ان شاء الله :)