قبل شوي كنت قاعد بالغرفة التانية متمدد جمب تالين و ظهري للباب و ريان كان بالغرفة التانية مع امه...
أنا استغليت الفرصة و صرت ألاعب تالين ....و فجأة تطلعت وراي و لقيت ريان بتطلع علي التطليعة تاعت "مسكتك يا خاين متلبس" و أول ما اجت عيني بعينو صفن فيه شوي و بعد أقل من ثانية صحي من الصدمة و صار يعيط و طلع من الغرفة و ما سمحلي حتى أبرر الموقف و بما انو سريع بالركض قررت اني ما ألحقو....
و استعملت كلمة السر الي خلتو يرجعلي زي التوتو...صرت أصيح بالبيت "زييييييت زيييييييييت" رجعلي عل سريع و لو انو أول ما شافني أعطاني ظهرو عشان أحملو على راسي....لكني راح أعتبر انو صفحة الخيانة و كسر الوعد الغير رسمي بأنو ما نلاعب المسكينة أبدا ...انها صفحة انطوت و ما راح تتكرر قدام ريان أبدا!
أنا مقدر وجهة نظرك بايا حبيبي و مافي أي مبرر للي عملتو و حتى لو كانت حشيشة أختك رايقة و مسخسخة و شكلها مشجع للعب هدا ما ببرر خيانة مشاعر معاليك...
ليست هناك تعليقات:
إرسال تعليق